تعرف معني العياط بعد الساعة واحدة؟
والفرق بين العياط ف الوحدة
والعياط علي واحدة
الناس بتقرب وتمشي وتسيب سنين جارحة
ادي الكلام تواريخ وادي السنين ثابتة
بليغ لما مشي مقصدش يفارق وردة
ولا وردة كانت عايزة تمشي
تموت الجناين وتفضلي وردة
تدبل عيوني والدمع علي رمشي
ف اللحن كوردات حواديت
حبيتك فجاة وفضلت حبة واديني مشيت
صفوف حكايات ف حضن السنين السارقة
كمنجات بتبكي وكمنجة جمب كمنجة
وكأنك انتي المايسترو وانا المزيكا اللي بتبكي
الناس بتسقف مش فاهمة
قلبي بيقولك بلاش تمشي
الشبع القلب والمعني ف البطون
هل الشاعر مات جعان ولا مات مَبطون
ولا ساب الشاعر داين
وقرر يموت مديون
القوافي وصلات امانة
والقصايد اتحولت لديون
سهران الوجع ف الحانة
والشعر بات مجنون
يا ايها الناس ف قلبي
دي فترة ومش هتعدي
سريري احتوي حزني والدمع نايم جمبي
كف الايام صوابعه معلمة ف خدي
شدوا الستاير واقفلوا الحفلة
وانتظروا بعد فترة رجوعي
القصيدة دي كانت عياط علي واحدة
والمزيكا دي كانت دموعي
_بقلم: عمر ابو الفتوح .
تعليقات
إرسال تعليق