كان في مرة طفل
قافل علي قلبه بقفل
عنده بعض الوعي
مُصاب بحزن السعي
الشنطة ف ضهرهُ
الصبر ف صمتهُ
الزمن بيطاردهُ
ومخبي ف قلبه حاجات
ف روحه الم وثبات
وشات قديم ممسوح
قلب مجروح
عصفور مدبوح
وشجرة بُكا شايلة غُصن حزين..!
تمر الايام ومعاها سنين
بص الطفل ف المراية
لكن معرفش هو مين؟
كبر الطفل وصبح شاعر
والقفل دا قصة قديمة
دا مش كلام دي مشاعر
جمعهم وكتب قصيدة
بعض الوعي راح
شغف السعي انتهي
الشنطة شالت جراح
والصبر ملوش مُنتهي
الزمن اتاريه جراح
والحاجات انا عرفتها
الالم لسة ف روحه
بس مفيش ثبات
الناس بدوا يروحوا
وكل فترة بيمسح شات
جرح القلب متلمش
ودي ملهاش عازة
دبحوا العصفور ومهتمش
والنهاردة صلاة الجنازة
البُكا ع الشجرة بيطرح وجع
والحزن معشش فوق الغُصن
صدرك ف الفراق جدع
لسة بيعرف معني الحُضن
ويشيل جواه بني ادمين
لسة الايام بتمُر
والمُر ساكن ف السنين
والسنة بتجيب سنة
ولسة الطفل قصاد المراية
بس الطفل دا انا...
بقلم الشاعر/عمر ابوالفتوح.
رسمة / احمد ماهر.
ايديت /عبد الرحمن خالد.
تعليقات
إرسال تعليق