رغم اننا مش هنرجع
بس امتي طيب ممكن نرجع؟؟
دي المرة الكام اللي بنتفارق فيها؟!
والدنيا بتضلم بالتدريج
والعمر بيبقي سواد
يارب ميكونش بنتفارق فعلا
ويكون المشهد متعاد..!
الشات مبقاش جمبه دقايق
كلامنا خلاص بقا تواريخ
بُعدك فعلا حاجة تضايق
بس انا مش ناقص توبيخ
ولا ناقص اشوف ايام سودة
هربان مني ف الاوضة
وبحكي للحيطان عنها
وابص م الشباك واقول للقمر يسألها
امتي طيب ممكن نرجع؟؟؟
هو بعيداً عن اننا زعلانين من بعض
وبعيداً عن كونك بعيدة
بس عمرو دياب منزل اغنية جديدة
وبما إنك بتحبي عمرو ياب
ممكن نختصر العتاب ونرجع تاني؟!
نلبس هاند فري واحد
ونشارك بعض الاغاني
تحضنيني بعيونك
وعنيا تقولك وحشاني
والقمر مبسوط وبيسمع
طال بعادك اوي..!
امتي طيب ممكن نرجع؟؟؟
البرد لما لمس القلب
صحيت كل الذكريات فجاة
فأكتشفت اني لسة بحبها
بس دي ماكنتش مفاجاة
الشتا كبر زي ما انا كبرت
وكل احتياجاته معادتش بطانية
البرد اللي بيلسع جلدي
خلاها احتياجات جسدية
والبرد اللي بيلسع قلبي
خلاني محتاجها هي
طب يا ست البنات
وست الناس وست الكل
الوقت رافض يمر
صباح رافضة تغني
والصباح مش زي الفل
والذكري واقفة بتوجع
طب امتي بقا ممكن نرجع؟؟؟
_ بقلم: عمر ابوالفتوح
تعليقات
إرسال تعليق