الشاعر:عمر ابو الفتوح

قصيدة: مجاتش سليمة 

"الحب اخره فراق ودا عيبهُ

والمشاعر دي حاجات قديمة 

دخلت بقلبي وخرجت من غيرهُ

والمرادي مجاتش سليمة... 

البطل لابد يفارق البطلة 

مش بيتجوزها غير ف السيما 

ودي الحالة الوحيدة لنجاح الحب 

والقرب ف ضل الحلال 

فيما عدا ذلك...

الامر مُحال...

اياك لو قلبك مال 

ترسم نفسك وياها ف كوشة 

وتختار معاها اسامي العيال 

وتسمع وياها اغاني 

عشان مش هتجمعكم كوشة 

والعيال هيكونوا لأب تاني 

يجوز ممكن تشوفها صدفة 

ايدها ف ايدها 

وانت ف مكاني وحداني 

صرخ الممثل ف يمين المسرح 

خبي البُكا وقال وجعاني 

الناس وقفت تسقف 

مع انه مكنش بيمثل 

صوتها واضح بتقول: انساني 

حقها كبنت تشوف نصيبها 

والعياط دا حقك الإنساني 

هنا انتبه الجميع ف العرض 

خارجة الدموع بالطرد 

البطلة بترمي الورد 

وبتسحب ايدها من ايديه 

ظهر الشرخ ف قلبه 

بان الوجع ف عينيه 

مشيت لاسباب تخصها 

بس مقالتش ليه 

نزلت دموع البطل 

وضلها علي رجليه 

والمشهد اصبح مخيف 

فرد الوجع ضهره 

وهنا زاد التسقيف 

لو كان عمرو حسن شاف المشهد دا 

مكنش هيقول وحشتيني 

ويكتفي بكلامها هي 

مكنش الفاجومي كتب زيزينا 

ولا غني لاسكندرية 

مكنش راجح داؤد هيعمل رسايل البحر 

كان هياخد الرسايل ويرميها كمان مرة 

كانت وردة هتشوف بليغ من جوة 

مكنتش هتبص زيهم من برا 

وليلي مُراد تقولي ان قلبي دليلي 

كُفرتي بأحزان جاهين ف شعرهُ

فطبيعي هخبي منديلي 

صوتك مش حلو بس انا عايزك تغنيلي 

ودا شئ كافي جدا 

يخليكي ليا تميلي 

سمعت كلامي ومالت 

وسمعت كلامهم وسابت 

حب ووجع ومشاعر 

واحزان عليها القيمة 

دخلت بقلبي وخرجت من غيره 

المرادي مجاتش سليمة...

الشاعر: عمر ابوالفتوح