الشاعر: عمر ابو الفتوح

قصيدة:شكلك لقيتي البديل 

"سرد مشاعرك ف هيئة شعر

 بيخفي فيك تفاصيل كتير 

قربتي ليه؟؟

مشيتي ليه؟؟ 

شكلك لقيتي البديل 

ادي الحمام رافض يطير 

غمض السحاب عيونه 

كتم المطر او كان بيخبي دموعه 

فطبيعي الصبح يكون مهموم 

انا شوفت السحاب خايف يعيط 

والناس من جهلها قالت غيوم 

محدش فكر قبل كدة!

ليه الغيوم والمطر مرتبطين دايما بالشتا؟

وكأن دموع الناس ف الصيف بتتبخر وتطلع فوق 

عشان كدة ف الشتا بتغيم...

واوقات السما بتعيط...

والسحاب يبات مخنوق 

والهوي يكتف ايديه 

والشوق واقف عليل 

مشيتي ليه؟؟

قربتي ليه؟؟

شكلك لقيتي البديل...

كان طبيعي هيجي يوم ونمشي 

حدوتة فاشلة ودي نهاية الحواديت 

قربتي مني... 

كسرتي ضلي... 

واديني خلاص مشيت 

اتنسيت ومفيش غيري فاضلي 

وجع فراقك مُمُيت 

 كسر سكون الخلق جوايا 

معايا الف دليل انك لازلتي معايا 

شات قديم كان فيه وعودك 

كلمة بحبك مني والرد كان كسوفك 

خوفك مش مبرر لخوفك 

رحيلك كان نية سابقة 

الدموع للعيون المؤمنة 

وانا عيوني مش كافرة 

وعد الليل ضلمة 

ليل الفراق خنقة 

قي اتنين بيتخانقوا جوايا 

مع ان القعدة ساكتة 

زادت همومي بزيادة السنين 

سنة اسخف من سنة 

وكل يوم بني ادمين 

نفسي ف يوم انساكي 

اسالك بدهشة انتي مين 

ساعتها مهما كانت همومي 

هكون موافق اشيل.. 

قربتي ليه؟؟ 

مشيتي ليه؟؟ 

شكلك لقيتي البديل 

انا مش بسالك عشان عايزك ترجعي 

لكن بسالك عشان وحشتيني 

مش هنرجع لانك محبتنيش 

لكن بحبك ودا شئ مش بايدي

واحشني كل شئ واي شئ كان منك  

كلامك مثلا قبل النوم

 كان امل كافي عشان اقوم تاني 

كلماتي كانت عيونك 

مفيش لحن بدونك 

وبالتالي مفيش اغاني 

اغنية كنتي اول كل حاجة 

بسمعها دايما ف الغياب 

مش عشان محتاج اغنية توصفني 

لكن عشان كنتي بتحبي عمرو دياب 

في الف باب هيتقفلوا الليلة 

في عيلة رسمتها ف خيالي سنين 

بس خلاص مش جاية 

صوتك كان حلو ف الاغاني 

بس الاغاني مكنتش ليا 

حُبك للشتا خلاني افتكرك كل برد 

ادي الشعر ف ضل السرد 

بيخبي المعني والتفاصيل..

قربتي ليه؟

مشيتي ليه؟

شكلك لقيتي البديل

_الشاعر: عمر ابو الفتوح