متلومش العشم لوجوده
لوم نفسك لانك اتعشمت..
درس الفراق بيزعل
بس ياريتك فهمت..
عينك علي التفاصيل
هتلاقي الف دليل يربطلك الاحداث
وبالقياس الحب مش مقياس
الناس بتحب الناس لوجود المصلحة
الناس بدون مبادئ
الناس بدون اساس
وكلها مِروحة
الدنيا برد جدا
وانا فاتح المروحة
ماسك ف الدنيا بايدي
وشغالة مطوحة
مراجيح يا دنيا
والقلوب متمرجحة
صفين ملاهي والعيشة تلاهي
الكل بيلعب بكلوا
الكل تاعب كلو
وصعب ف الدنيا تلاقي
صباح الحزن المسائي
مساء الحب الهوائي
دوا الحب ف القرب
والقرب منك دائي
شتا الغريب يا حبيب
حزين بس مبيوجعش
كل اللي راح بجراح
بيمشي ومبيرجعش
ادخلي قلبي بسلام
امشي فيا وحني
يا تعالجي الاوهام
يا تشيلي حُبك مني
اقري الكلام ف عنيا
او امسكي ايديا وحاولي تقري الكف
هتلاقي عمري زاد
هتلاقي حبي زاد
بس عقلي أخف...
دي مش اول مرة اكتبلك
تقريبا دي المرة الالف
ع العموم افهمي لوحدك
وارحمي القلب اللي حَبك
وامشي بدون جروح
انا عمري مني اتسرق
وصعب اني ابوح
وطبيعي اخاف م الغرق
دي مش سفينة نوح
اجمع الناس ف قصايدك
واحسب المجموع
تلقي ف طرح السنين
قلبك هناك موجوع
وتقول ياريتك هربت
فمتلومش العشم لوجوده
لوم نفسك لانك اتعشمت...
عمر ابوالفتوح
تعليقات
إرسال تعليق