الشاعر: عمر ابو الفتوح

"مش أسف"

اديني كرسي قصادك 

واهديني ف الكلام مساحتي 

مش اسف لو هقطع وصالك

بس مضطر احكي حكايتي 

تركت قلبي ومشيت من غيره 

وقولت لنفسي بكرة هلاقي 

واللي دفع الحساب دموع من عينه 

راح بالسر ومخدش الباقي 

متسالنيش عن دواعي الحب 

او فروض الاشتياق

قبل ما تجاوبني 

هي ليه حلوة ف الفراق؟!

مشيت ف الليل لوحدي 

بعيط لخلق الله 

انسان وقلبه مش معاه 

هواه ضل السير 

لجل ما يحرر هواه 

ملعون يا حضن الليل 

والقمر سايب سماه 

بُص بصة ع النجوم 

بينا نقوم

ونسيب بواقي المحنة  

ناخد للسما رحلة 

بصيت ليها واتنهدت

بصيت اكتر وسكت 

استغربت وبعدين فهمت

 نص الدنيا ف عينها 

نص نصوص الشعر ف ليلها

شابك قلمي ف عيونها 

والشعر محبش غيرها 

اتنين ف خيالي اترسموا 

وكام جولة من غير منافسة اتحسموا 

هربت دموعي لعيني 

لما قالوا: مجنون بيكلم نفسه!

هما اللي مجانين 

هما اللي مش فاهمين 

هو انتوا ليه ساكتين

قل اعوذ برب الشياطين 

ورب البني ادمين 

ورب الغلابة والمساكين 

انا برغم اني عربيد 

لكن مش ملحد زيهم 

انا لسة باقي عندي دين 

وإن كان ف دينك شي يدينك 

اخلط وجعك بيقينك 

كل الناس سايبينك 

وانت لازلت بتسألك: هو انت فينك؟

حزن زمان ساب علامات 

بس هتفضل شايله ف عينك؟

ملعون الود اللي منع هجرك 

والرئة اللي لعنت سجايرك 

والناس اللي طاروا ف الدخان 

انا اول حشاش ف الدنيا 

بيجرب يشرب نسوان 

صاحبي الصنف امان 

بلاش تكتر مش كدة؟!

خلاص شربت؟

بالشفا 

خلع الضروس يحتاج لحكمة 

اخد الدروس يحتاج لصبر 

هقبل نصحيتك بشرط 

لو نازل معايا القبر 

شد عيونك خطاوي 

ومد رجلك دموع 

ولو الدموع جابت حكاوي 

يبقي ف الخطاوي مفيش رجوع 

وانت اللي ابسط من كدة 

رغم بواختك 

عمقك ف الشعر وسخافتك 

والهجر كاشف وكاسف 

معلش لو كنت ازعجتك 

بس انا برضوة مش اسف 

_عمر ابوالفتوح