الشاعر: عمر ابو الفتوح

قصيدة"فضفة بعد الفراق"

تعرفي دي المرة اللي كام اللي امشي بعيط فيها؟! 

ممكن تسألي الايام هتعرفي كام حاجة مخبيها!

ضحكة كانت باقية ليا او ذكري كانت باقية ليها! 

حاجات بالوقت ضاعت فيا وحلفت ما تكمل الا بيها! 

سلامة البكا فوق خدود الوقت بتنعي وفاة الشغف بالسم 

مدح الحاجات دلوقت هيخليك غصب عنك بعدين تذم 

زرع الورد ف جناين حزنك فعلا شئ مهم 

ونسيانك لحاجات كانت بينكم دا شي اهم 

الحب زي الكانسر لو مشي ف الدم 

لسة فاكر الليل لما قال للقمر: الحق دا بيه بيحب 

قولي حصل ما بينكم اي؟

قولتلو مشينا حبة وجبتلها لب 

الطريق رغم كونه طويل بس كان الليلة قصير 

والوقت فات بسرعة والعالم حواليا بيتغير 

مشيت قصادي وقالتلي هكلمك بكرة 

ضحكت فعرفت اني حي!

راحت مع اول واحد اتقدملها 

ونسيت تقولي ان بكرة خلاص مش جاي!

فمشيت ف الشاعر اعيط شعر 

وصبحت شارع يتمشوا فيا و يشوفوني الناس من برة 

حبيت جدا كوني شارع 

جايز تفوت جوايا ف مرة 

تيجي احكيلك عن منظري ف القهوة

حزين ودقني طويلة 

بكتب دموع واعيط قصيدة

وعلبة سجايري واقفة حداد علي روح الولاعة المسروقة 

قلبي شبه الكوباية اللي بتعيط هناك عشان مكسورة 

ضحكتي شبه القهوجي اللي بيضحك رغم همومهُ

بس الفرق بينا ان انا بضحك عشان لو مضحكتش هموت

لكن هو بيضحك عشان يعدي يومهُ

شوفت كرسي قاعد لوحده 

خدت نفسي وقعدت جمبه 

مش شرط اقعد واكلمه او اعرف اي ف قلبه 

لكن مهم اكون طبيبه ومن غير ما يتكلم اعالجهُ

وارفض اخد تمن العلاج 

يا صدفة البكا لما بكون محتاج 

خليني اشوفها مرة او حتي اشوفها من بعيد 

حَقن الروح بالنسيان محتاج لموت 

مش زي باقي الحُقن بتحتاج لوريد 

الحزن المرة دي شديد بس انا هبقي تمام 

دا بجد فعلا مش كلام 

ومسيري ف ليلة هلاقيها 

عشان لابد اسالها: تعرفي دي المرة الكام اللي امشي بعيط فيها؟!

_عمر ابوالفتوح