أنا أسف جداً كان نفسي
ماجرحش شعور حد عرفني
كان نفسي كل إللي يشوفني
أبقاله سبب بهجه وفرحه
كان نفسي ماسيبش ف ذكراكم
عثرات أو أوقات جارحه
أنا أسف للي إتمناني
وبرغم عنادي لا ساب ولا مل
أنا أسف للي إستناني
سنين من غير الشوق ما يقل
أنا أسف للي إستقواني
سند فلاقاني بميل وأختل
أنا أسف جداً سامحوني
أنا بظلم من غير ما أقصد
ده أنا وبكل غباء بوصد
ف بيبان هتجيب فرح وراحه
أنا أسف لكن بصراحه
أنا عندي لكل ده أسباب
أنا يمكن أكتر واحد إتساب
في عز ما كان هوا متبت
أنا ضمن الناس إللي إتحبت
وإتسابت علشان ماعهاش
قدمت السبت كتير لكن
إستنين الأحد ماجاش
أنا عايش لكن مش لاقي
في الدنيا حاجات علشان تتعاش
فطبيعي إني أكون معتل
بفوبيا العِشره والعلاقات
وإني أكفر بجمال البدايات
مهما البدايات دي هتطول
أنا نفسي أقدر أصدقكم
أنا نفسي أكون ذي الأول
وأستغني عن قلقي ويأسي
أنا أسف لكن مش ليكم
أنا أسف جداً علي نفسى
# حسن محمد
جميلة جدا
ردحذف