عندي الف مُبرر يخلينا نتكلم تاني
زي اني مثلا مش لاقي حد احكيله زعلي
او جايز لانك وحشاني
ممكن عشان بسهر الليل لوحدي
ودا ف ظني سبب كافي..!
او عشان لابد الطير يقع علي شكلهُ
يمكن محتاجة حد يطبطب علي قلبك
نصيب الفرد ف الحب يستاهلوا
وانا بصراحة استاهلك
جميل الحب بمشاكلهُ
وانا برضوة حابب مشاكلك
ومش حابب كوني وحداني
عندي الف مُبرر يخلينا نتكلم تاني
زي ان ساعتي واحشها معادك
فنجاني لوحده بيبكي ع التربيزة
وممكن يهدأ لو شاف فنجانك
محتاج اشوفك عشان اتطمن ان الدنيا لسة بخير
ف عالم مليان سواد وغش
محتاجك عشان مش عارف اعمل قهوة
ف غيابك بتطلع من غير وش
محتاج احكيلك مشاكلي وتسكتي
بس وحشاني اسمع معلش...
محتاج عشان واحشني نفسي
عشان ف غيابك حد تاني..
عندي الف مبرر يخلينا نتكلم تاني
محتاج نتكلم مثلا وابعتلك كام غنوة
عشان اخر مرة اتكلمنا
تقريبا نسيتي تودعيني
ممكن ترجعي لاني كتبلتك قصيدة حلوة؟
ولاني محتاج اقولك وحشتيني...!
سنيني ف بعادك ناقصة حاجة
وانا برضوة بخاف تنسيني
محتاجك عشان اتخانق فيكي
والمس الحب ف هدوء العتاب
كنتي الوحيدة الصادقة
ف عالم اصلا كداب
واحشني اسمع تاني يومك
واشوفك بتنعسي وتقاومي نومك
وتخبي عشان نفضل نتكلم
اشوفك بتلمسي عيوبي
وحابة برضوة اننا نكمل
محتاجك جمبي لانك انتي
ف غيابك وحيد ولسة بعاني
هيحصل اي لو رجعتي؟!
عندي الف مبرر يخلينا نتكلم تاني...
تعليقات
إرسال تعليق