الشاعر: عمر ابو الفتوح

قصيدة: الهزيمة الاخيرة 

"انتي مش انتي زي ما كتتي ف عيني زمان 

صبري طال زي هجرك ومنين طريق النسيان؟

قسوة ف قربُك

 غرقان حُبك

 والبُعد عنك بر...

مر العمر علي قلبك والجاي ليا اَمَر...

كل الذكريات ف الشتا..

ودا سبب كافي عشان احب الحر..

بخاف يبان الشوق ف كلامي ....

بنعوز نفارق بس وقت ما نعوز...

بُعدك لسة علي بالي...

ودي حاجات تخص فيروز...

عشان كدة...

اتخلقت فيروز واتربطت ف الشتا 

عيطت السما ومجازاً قالوا دا مطر 

عيطت انا وصاحبي قال: تعيش وتفتكر...

قريتوا الكلام وافتكرتوا حد سايبكم...

وقالت ام كلثوم العيب فيكم يا ف حبايبكم...

وانا مش جاي اقولك نرجع 

لكن جاي اقولك إنك كنتي حلوة ف العناد 

وكنتي منورة جدا ف البعاد 

لدرجة ان نورك غطي علي نور اللُمض 

لو كنتي رضيتي باوضة وصالة 

كنتي عرفتي انها بالرضا 

مش بعدد الاوض 

برغم النور اللي ف بُعدك 

انا لسة مش شايف حاجة 

ودي مش اعذار...

دي سذاجة... 

في نفوس توعد وتوفي 

ونفوس تبعد وتكفي 

ونفوس تفضل محتاجة 

ولولا الاهلي وعمر خيرت والشعر 

الدنيا كانت هتفصل سادة 

البن سادة والحزن زيادة 

القصيدة شوافة واشواقي متسابة 

السُكر ف عيونك والخمرة ف الحانة 

الهجر ف سكوتك ووجعنا ف هوانا 

اساس البعد ف عِندك 

طرف الذكري ف النسيان 

اشتريت نص الوهم لما قولتلك بحبك 

واتباع لي النص التاني لما قولتي وانا كمان 

واحشك زمان؟ 

ولا ما بينكوا معاد 

كلها نسيان!

والحنين عواد 

زادت مسافة 

وانا امشي بلادك 

احزان شفافة 

بدون اثبات 

بموت لوحدي 

ومحدش مات 

طفل فيا بيحارب شاب كبير  

وانا الوحيد خسران 

لا عمري هرجع طفل 

فهكمل كدة سكران 

ماشي وبقول الدنيا فُل 

بدور عليكي وسط الكل 

ف نظرهم مُدمن كحول 

وف نظري للأسف مفيش غيرك... 

اصاحبك ف جرحك 

اذمك ف مدحك 

واحفظ خط سيرك 

امسك قلبي واقفل عليه بقفل 

اشغلك جوايا وتلعنك فيروز 

اخسر الشاب والطفل 

وابص ليا الاقيني عجوز....

_عمر ابوالفتوح